قريوش الوردة بالتفصيل الممل وبالصور

كيفية صنع قريوش

السلام عليكم أحباءي اليوم جبتلكم نوع رائع من القريوش وجربوه على مسؤوليتي
العجينة
1كلغ فرينة
علبة مارغارين نتاع250غ
1مغرف كبيرة خميرة الخبز
1خميرة نتاع القاطو ..كيميائية
مغرف كبيرة مليانة خل
1مغرفة فاني
1بيضة كاملة
مزيج من ماء الزهر والماء العادي يكونو دافيين حسب الحاجة
الزيت والعسل
طريقة التحضير
تذوبي كمية الزبدة وتصبيها فوق الفرينة وتخلطي مليح حتى تولي مثل حبيبات الرمل تزيديلها البيضة وقرصة ملح والفاني وتخلطي شوية وتزيدي الخميرة نتاع الحلوى ونتاع الخبز تخلطي شوية وتزيدي الخل والماء وتلمي حتى تتحصلي على عجينة ماشي طرية بزاف
وتخليها ترتاح ساعة كاملة
قسميها لقطع متوسطة وحليها بالرلو ثم بالمشينة نتاع العجين رقم5 حتى تتحصلي هلى شريط قطعي منو حبات بطابع المارغوريت المتوسط والكبيروالصغير كي تكمليها حطي مارغوريت كبيرة وادهني الوسط بشوية بياض بيض وهدا هو السر في انها ماتتنحهاش الحبات من بعضها وقت القلي وزيدي فوقها حبة من نفس الحجم لكن حطيها بطريقة معاكسة وادهني الوسط بياض البيض ولصقي حبة المارغوريت المتوسطة وادهني الوسط بياض البيض وزيدي فوقها حبة صغيرة لكن حطيها معكوسة واخيرا اغطسي حبة لوز من الجهة الرقيقة في بياض البيض وارشقيها مليح
ولما تكملي جميع العجينة اقليها بلون ذهبي ثم عسليهاوديري فوقها البيستاش او الجلجلان وكانت النتيجة رائعة